Ona ko̠yo̠ḱ ho̠rreko tahẽ̠kana
Hapṛamko aleren
Tala ńindạ ipilko leka
Ritić reaṛre bo̠ro̠pko cetante
Gujuḱ reaḱ se̠ṅge̠l talate
Ṭunḍạṅ arko taṛamakada
E̠ke̠n sạdhinte jive̠do̠ḱ lạgit́.
Hajar hajar serma bin oporomge
So̠ṅge̠te muć leka
Buru lodamkore gạiko ạtiń leka
Mo̠ro̠n setoṅ daḱ jạput́
Kucit́ ḍahar jeleń ńo̠ṛo̠m ńut
Ạluạbusạḱ hahaṅkarre taṛamakadako
E̠ke̠n sạdhinte jive̠do̠ḱ lạgit́.
E̠se̠t́ ho̠r oka eto̠m oka kõ̠yẽ̠
Menaḱ okare jiwi okare mo̠ne̠
Bo̠to̠r digdhạ ho̠ṛmo̠ dhukuṛ o̠nto̠r
Ṭunḍạṅ paro̠m dhasna ḍhalaṅ ḍo̠nḍho̠r
Ciạkedako nãwã diso̠m Dạmin-I-Koh
Menaḱ ṅit hõ̠ kisạ kạhni kudum arko
Berelenako nãwã hasare
Balbal daḱ jo̠ro̠ kate
Ho̠ṛmo̠ mãyãm lingi kate
Go̠ṛho̠n benao kedako nirại diso̠m sona gaṛ Santal Pargana
E̠ke̠n sạdhinte jive̠do̠ḱ lạgit́.
Disạ menaḱgea ńit aleaḱ
Towa dumur rasa ạtuḱ diso̠m
Hihiṛi -Pipiṛi Cại Campa
Bado̠li ko̠enḍa gaṛ bạgiakat́ reaḱ
Raṭe̠n bir talate
Jhạwạ jạnum cetante
Kaṭaha janwar são lạṛhạikate
Taṛamakadako hapṛamko aleren
E̠ke̠n sạdhinte jive̠do̠ḱ lạgit́.
Mạrkhu maraore hõ̠
Baṅle mo̠ho̠r meṭaoḱ
Dubi ghãs re̠he̠t́ leka
Racaḱ kajaḱgele tahẽ̠na
Ho̠e huḍuṛ bharṇḍo birbãore hõ̠
Go̠go̠ koṛamre je̠mbe̠t́akan
Simiṭ dhuṛi leka bạisạugele tahẽ̠na
Dare sakam leka sage̠no̠ḱregele tahẽ̠na
Oporom baḱańcaore
Lạṛhạitegele tahẽ̠na
E̠ke̠n sạdhinte jive̠do̠ḱ lạgit́.
Mul o̱no̱liạ- Albinus Hembrom